الحب شىء جميل جدا فى بدايته أحاسيس جميلة و سعادة و تألق لأقصى حد فى كل شىء .. الخطوة الثانية إضطرابات فى النوم و عدم رغبة فى الأكل و تسارع فى ضربات القلب تصاحبها آلام فى المعدة .. و مع تطور الحالة يبدأ الحب فى مهاجمة مخك و تدريجيا تلاحظ حالة تشتت و بله ملحوظ تبدأ فى التخييم على مخك و تتجسد فى كل تصرفاتك .. مش عارف تركز و لا حتى تفكر فى أى شىء خاصة عندما تقابل حبيبك .. تقول كلمتين .. بعدها يطير كل الكلام .. تحاول التذكر.. مخك رايح جاى .. كلمة ثم صمت ثم لعثمة يعقبها شرود ثم إنصراف!
إيه إللى أنا باقوله ده ! حاسس إنك عبيط و أكيد حبيبك قال عليك معتوه .. لكن إطمن .. دى حالة شائعة جدا فى الحب و ناس كتير عانت من نفس المشكلة و شعرت بنفس الهبل تقوللى ما انا عارف بس المشكلة فى حبيبى و الفكرة إللى أخدها عنى .. أقولك إهديله أغنية لما بتكون بعيد باحضر كلام أقوله و أما بتكون قريب بتنسينى اليوم بطوله و لا باعرف أتكلم و يا دوب كبيرى أسلم .. يا عمرى و الله لما أشوفك بانسى الدنيا دى ، بانسى الكلام إللى أنا قايله حتى الغرام إللى أنا شايله.. ليتأكد إنك طبيعى و كل دى مجرد أعراض جانبية للحب عند كل الناس .. لكن هل تعرف سبب التشتت و النسيان و عدم القدرة على التفكير ، و الهبل الذى تشعر به فى حالة الوقوع فى الحب؟!
بيقولك إكتشفوا إن الحب يؤثر على نشاط المخ و يقلل القدرة على التفكير بشكل عام ده غير المناطق التى يصيبها الشلل التام و هى المناطق المسئولة عن الإنتقاد و التقييمات السلبية حيث تتوقف عن العمل تماما .. و لهذا قالوا زمان إن الحب أعمى لأننا عندما نحب نرى من نحب أعظم حد فى الدنيا و خاليين من العيوب..
ده غير تأثيره على المناطق المسئولة عن الذاكرة و التركيز .. عشان كده لما أبويا يقول فنجان قهوة بأعمله شاى و فى الآخر باديه لأمى .. و أراهنكوا إن شادية فضلت تصب فى الشاى لحد ما إتدلق من الفنجان على الصينية على الأرض .. و بيقولك كمان إن الحب له نفس تأثير تعاطى المخدرات على المخ بعد تصوير المخ بالرنين المغناطيسى حيث لوحظ أن الحب يؤثر عليها مثل تعاطى المخدرات يعنى لو لاحظت حد مسطول مش ضرورى يكون ضارب ممكن يكون واخد جرعة حب زيادة..
و أحسنلك بكتير إنك تضرب حب بدل ما تضرب مخدرات على الأقل الحب أوفر و ألذ و له نفس التأثير و جايز أكثر كمان..
لكن الكارثة إن الأمن يدرج الحب ضمن قائمة الممنوعات و الحب ما يتعرفش غير بروشته من الطبيب.
و لما تقابل حبيبك بدل ما تقول له الحب الحب .. الشوق الشوق تقول له إنت أحلى جوينت فى حياتى و لما بشوفك الطاسة بتتعمر كأنى ضربت خلطة منوعات.
كل هذه التأثيرات أثبتتها عدد كبير من الدراسات التى أجريت فى بريطانيا و أمريكا.
الخطر الحقيقى إن الحالة تقلب على جنان خاصة عند الناس إللى عايشة الدور صح و عندها ضمير فى الحب و وصلت لدرجة عدم القدرة على التفكير و لنا فى قيس مجنون ليلى خير عبره ، الحب فضل يمسح فى دماغه .. يمسح فى دماغه لحد ما خلاها أبيض يا ورد..
فى النهاية قدامك طريقين .. الأول إنك تنفض الحب خالص و تحافظ على مخك و صحتك على أساس إنهم أنفعلك .. الطريق الثانى إنك تحب بجد و تضحى بعقلك فى سبيل إستمتاعك بالحب

السلام عليكم ورحمة الله ايه رايكو اخوانى واحبابى فى الحب يا ترى ده صح ولا راى غلط فى الحب لو فى اى راى تانى يا ريت الرد متنسوش انا الحزن عنوانى

السلام عليكم ورحمة الله

موضوع جريء بصراحة ولم يطرحه احد قبلك

وانا انصح الجميع الالتزام بالنصيحة الاولى احسن

وهذه معلومات علمية جديدة عن تاثير الحب على الدماغ بصراحة اول مرة اسمعها

الحمدلله على نعمة الحب الحلال وهو الذي ياتي مع الزواج

وادعو الله ان تنالوه فهو اصدق واجمل حب

محبة الوطن

كلام جميل اوي يمكن يكون الموضوع يموت من الضحك لكن زي ما بيقولو هم يضحك وهم يبكي لسه في ناس كتييييير لحد لوقتي اما مسطوله وقاعدو تبكي على الوسادة الخالية واما يعييني لسة في الاول مخدوعين بلذتة الاولنيه واكثر النواع هبلا اللي بيدوروا عليه! واخر الانواع والحمد لله القليلين اللي فايقين لمصالحم ودينهم وبيدوروا على حاجة اهم ومش عايزينه من الاول او ربنا تاب عليهم وذاقوه وحرموا وقالو الحمد لله توبة من دي النوبة

السلام عليكم ورحمه الله وبركاته
كلام صح اوي وزي العسل بس مش بايدك تختار لانك وبساطه متقدرش
نصيبك انك تحب ونصيبك انك تتعذب فيه
الحاجه الوحيده اللى ممكن تختارها هي انك تبعد لما متلاقيش ليك مكان في قلب حبيبك ولا في حياته صح ولا غلط؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

السلام عليكم ورحمة الله
اخت امل انا معاكى ان الحب مش بايد الانسان بس لو الحب هيتعب الانسان فى حياته8 يبقى بلاش منه احسن لو هيريحه يبقى لازم يكون اكيد ويا ستى لو على الحب كلنا بنحب انا عن نفسى بحب الطبيعة وبحب الجمال والاشجار وبحب اصحابى وبحب كل الموجودين فى المنتدى اللى زى العسل ده بجد انا ارتحتله كتيررر اوى اخوكم

(( الحزن عنوانى ))