يوم الاثنين الاسود
فيها ايه لما تودع الف شهيد غرقوا فى عباره وانت بتتفرج على ماتش كوره
فيها ايه لما المثقفين يموتوا حرقا فى قصر ثقافة بنى سويف والمسئول يطلع براءه
فيها ايه لما يموت الفقراء حرقا فى قطار الصعيد ولا يحاسب المسئول ولا يصرفوا التعويض للاهالى
فيها ايه لما يلوثوا دمنا ويموت العشرات بسبب فاسد من اعوانهم وبعد كده يهربوه
فيها ايه لما يموت والدك وابنك وجارك وصاحبك بالسرطان اللى جابه يوسف والى وانت بتتفرج ومش عارف تعمل ايه
فيها ايه لما يضرب القضاه والمعارضين والصحفيين اللى بيدافعوا عن البلد لانهم اعترضوا على الظلم والنهب والسرقه
فيها ايه لما يعتقلوا اخوك ويعذبوا ابوك ويغتصبوا اختك ويهتكوا عرض خطيبتك وانت واقف بتتفرج
فيها ايه لما يقبضوا عليك ويعرضوا عليك مجموعه تهم وتختار منهم واحده وتدخل السجن لانك مش قادر تقول لا
فيها ايه لما يغيروا دستور بلادك وانت مش فاهم هما بيعملوا كده ليه
فيها ايه لما يلغوا اشراف القضاء ويزورولك الانتخابات وينجحوا الحراميه اللى سرقوا بلدك وخلوها تكيه ونهبوا حقك وبقيت مش لاقى اللقمه الحاف
فيها ايه لما يقلولك حانلغى قانون الطوارىء وهما بيحطولك قانون ارهاب ويفتشوك ويعذبوك ويقلولك ما قانون الارهاب اللى انت وافقت عليه بيدينا الحق يا سعاده البيه
فيها ايه لما تقعد فى بيتك يوم الاستفتاء وتسيبهم يخططوا ويزوروا ويعدلوا وفى النهايه تقعد تقول يا ريت اللى جرا ما كان
فيها ايه لو نزلت انت واهلك رحت تدور على حقك ومش بس حقك ده حق عيالك وجيرانك وصحابك ده حق بلدك
فيها ايه لما تروح تقول لا للتعديل انا مش عايز اكون ارهابى وبرضه مش عايزكم تتهموا عيالى
لازم تنزل من بيتك ده مش حقك لوحدك ده حقنا كلنا ليه تضيع حقنا
حاتلاقينا كلنا مستنيينك يالا تعالى ايدى فى ايدك نغير بلدنا ونقول لا للتعديلات الدستوريه نقول لا لنظام الحراميه
الاتننين 26 /3 هى فرصتك الاخيره علشان تقدر تقول لا انا عايز حقى وكلنا معاك حانقول لا للتعديلات الدستوريه ده حقنا كلنا اللى حانتسأل يوم القيامه ليه فرطنا فيه
