أيد لوحدها ماتغيرش
قال رجل الى عمر بن الخطاب وهو خليفة المسلمين (( اتقى الله ، فيرد " لا خير فيكم إن لم تقولوها ولا خير فينا إن لم نسمعها " )) ولا خير فينا إن لم نقولها اتقى الله يا مبارك !!!
بسم الله والصلاة والسلام على خير خلق الله سيدنا محمد صلى الله علية وسلم ..
أخوتى فى الله السلام الله عليكم ورحمته وبركاته ...
أيها الغافلون !!! عفواً أيها المسئولون ؟؟؟
كفاية كده حرام عليكم ، بلاش تستغبوا المواطن أكتر من كده بلاش تحسسونا أننا عبط أو أغبيا للدرجة دى ...
زهقنا تصريحات من هنا ومن هنا ،،، أرحمونا بق وسكتوا شوي
كل شوي طالع واحد منهم يصرح له كام تصريح ،،،
مره نسمع من وزير المالية او الاستثمار أن الحمد لله بفضل جهود سيادة الريس وحكمته فى أجز القرارات مصر تقفز نحو الإمام فى معدل الاقتصاد ويرتفع معدل الاقتصاد الى 7% ،،، اقتصاد ايه اللى ارتفع ده اه أسف ، انا مش واخد بالى سمحونى أصلى مش من البلد دى ، هو فعلاً الاقتصاد ارتفع وبأكتر من كده بكتير بس مش فى جيب الشعب المصرى ، أرتفع فى جيب سيته وحرمه وأبنه المصون ...
ومره تانيه يطل علنا وزير قال ايه وزير الاقتصاد ولا مش عارف ايه ، وينفخ صدره قوى ويقول لازم نقف وقفه حازمه مع التجار البشعين والمخربين واللى بيرفعوا فى الاسعار من غير حساب ، عمل ايه بق سيته قال ايه أوقفوا تصدير الاسمنت والأرز ،،، أسمنت ايه ده اللى انت وقفت تصديره وقفت نوعين من الاسمنت انقرضوا أصلاً ( الكرنك ، بورتلندى عادى ) النوعين دول أصلا معدوش بيتصنعوا من أساسه ولو أتصنعوا مبيتصدروش أصلاً لانهم مش للخرسانه يعنى كبرهم بالبلدى كده يبنوا عشة فراخ ،،، اما صح اللى قدرت عليه سيتك وسيادتهم معاك ، الفلاح دى اللى بتقدروا تدوسوا عليه ، مرا ترفعوا عليه السماد 500% ( شكارة السماد تضاعفت 5 مرات ولسه بتزيد دى فى أقل من 6 شهور من 34 الى 165 جنيه ) والسنه اللى فاتت خربته بيته فى القطن يعنى لو كان قادر يأكل القطن كان كله ومن قبلها فى القمح ضحكته عليه وأختوا منه الإردب على 150 جنيه وهو كان تمنه 280 جنيه والسنادى الله اعلم هتعمله فيه ايه فى القمح ، بس أكيد نويلنه على نيه سوده ،،
يا وزير الايه انت لو صح عاوز تقف للاسعار أفتح استيراد الحديد اللى تمنه بره 3000 جنيه وهنا 6500 وايضا امنع تصدير الاسمنت نهائياً مش نوع ونوع ، وعلى فكره التجار دلوقتى مش بيصدروا اسمنت دول بيصدروا المواد الخام نفسها ، ولو خايف على الفلاح صح ويهمك ان القمح يزيد ليه بعت مصانع الأسمدة وليه بتصدرها برده والفلاح هنا مش لقيها .
ومرة تالته يطل علينا وزير قال ايه اسمه مصلحى وقال ايه بيقلك دى وزير التضامن تضامن ايه بس حرام عليكم بق بالزمه بلد بطلها وعرضها ( أقصد المسئولين فيها يعنى ) مش قدرين يحلوا مشكله رغيف العيش ، ويطلع واحد منهم قال يقلك ايه مفيش أزمة ولا حاجة دى حكايه مختلقة ، بق أزمة العيش حكايه مختلقه ،،، ومين بق اللى أخلقها انا ولا انت ،،، يعنى الراجل اللى سم ولادة ومرآته مختلقه والعشرين واحد اللى ماتوا على الافران مختلقه والطوابير اللى مش بتنقطع من على الفرن والله الطوابير 24 ساعه مش بتنقطع مع العلم ان الفرن بيشتغل 5 سعات بس اما الطابور شغال 24 ساعة كل ده ومختلقه ،،، طيب أرد عليه وأقله ايه .... ولا واحد تانى يقول ايه فعلاً كان هناك أزمة بس الحمد لله بفضل السياسة الحكيمة تم حلها تماماً عن طريق مش عارف ايه كده ويفضل يرص لك شويه كلام ويدخلك فى ميت موضوع وفى الاخر يقلك حلناها والحمد لله ،، حليتوا ايه بس حرام عليك انتوا فعلاً حليتوا بس مش حليتوا المشكله انتوا حلتونا احنا ...
أما المرة دى بق تختلف عن كل اللى فات دى بق من فوق قوى من سياته بنفسه ،،، قال ايه بيقلك رأفتاً بحال الشعب المصرى تم رفع التعريفة الجمركية عن بعض السلع التموينية حتى تنخفض الأسعار فى السوق المحلى ،،، سلع ايه دى اللى انت شلت من عليها الجمرك ، عندك حق والله فعلاً الشعب كان هيموت وبيقطع فى بعضه علشان مش لاقى يا عينى ( زبده ) فصدر سيته مشكوراً قررا برفع التعريفة الجمركية عنها والله كتر خيرك ويا ريتها زبده بقرى ولا جموسى دى باين عليها زبده كلابى ،، مفيش حد سئل نفسه ليه سيته أخز القرار ده ، القرار مكتوب فيه السلع التموينية دى القرار ، اما بق السلع طبعاً الزبد على رأسهم شوف بق وايه كمان ماده خام تستخدم فى صناعة (( صناعة ايه )) (( صناعة الحديد الصلب )) يعنى صعبان عليه قوى (( أحمد عز )) فقال لازم نشله الجمارك من على الماده دى طيب نشلهاله اذاى ندخلها من ضمن السلع الغذائية ،،، بق بالزمه يا ناس ماده خام تستخدم فى صناعة الحديد الصلب تبقى من المواد الغذائية ،،، طيب ردوا عليه انتوا ....
وله يقلك ايه انا طلبت من الحكومة انها تشوف حل فى العلاوة وتزودها شوي ، والله كلامك ده بيحسسنى ان الحكومة دى من كوالا لمبور هى الحكومه دى مش من البلد دى برده ولا ايه يا شعب طيب مش بتأمرها ليه وله الحاجة دى مش على مزاجك .
ومره يهل علينا علينا وزير التعليم ويقول ايه الثانوية العامة يا جماعة لازم نعدلها ،، طيب عدل ، وايه هو التعديل بق نخليها سنه وحده بدل اتنين ، طيب مهى كانت كده من الاول ليه تغيروها ،،، يا أخى أرسوا على بر بق تعبتونوا وزهقتونا وقرفتونا ... وأخر نكته بق فى التعليم ،،، يطل علينا الوزير المبجل فى مجلس الشعب ويرد على طلب الإحاطة اللى موجهله بخصوص حالات التسمم الناتجه عن التغذية المدرسيه (( الحالات دى حصلت فى 20 مدرسه معظم المدارس فى الصعيد وفى الدلتا وعدد الطلاب وصل الى 450 طالب )) شوف رد الوزير بيقول ايه ،،، بيقلك مفيش حاجة اسمها تسمم فى البسكوت والبسكوت كويس تماماً اما حالت القيء والمغص دى كانت كل تالى طالب أكل فى بيته أكل تقريبا مش كويس فذهب الى المدرسه فحدث له قيء ومغص فتحول الى بعض طلاب الفصل عن طريق (( الإيحاء )) يعنى 450 طالب من الصعيد الى الدلتا حصلهم إيحاء ...
بالزمه مش حاجة تجيب الإيحاء على رأى الوزير .
أما اللى لسه مش كمل 30 سنه بيبشرنا ويقلنا ايه بق ( طول ما أنا فى الوزاره العمالة المؤقته تنسى التثبيت )
دى بالنص منه تقصد ليه يعنى عواز تخلى الشباب اللى شغال يفرقع مثلاً ولا يخبط دماغة فى الحيط ولا بتقله ايه بس ،،، انا بصراحة لو رديت ..... ولا ردوا انتوا
اما الست هانم حرم سيته ،،، كل يمين سحبه وزير ورها وبتلف فى البلد وتصدر اوامر وتقرر أمور ،، تصدر اوامر بصفتها ايه ، وقال ايه القراءة للجميع قراءة ، والله لو تعرفوا كم الفلوس اللى بتنصرف على الكلام الفاضى بتعها ده ، ويا ريته عاجب مش كفاها ده كله فسرقت فلوس التبرعات والله كم التبرعات اللى الشعب المصرى اتبرع بيها تبنى ميت مستشفى بس تقولوا ايه حميها حرميها ...
وغيره وغيره ولسه اللى جاى أكتر ،،، مادمنا فى غفلة حق لهم أكثر من هذا
لا ادرى ان كانوا هم حقاً المغفلون ام .....!!!!!