أكثر ما يُثير جنوني في تربية الأولاد هو أن أرى عيل قليل الأدب أمامي

وأهله كإنهم ألواح تلج .. لا بيقولوا له عيب ولا غلط ولا إتأدب يا ولد ..

على اساس يعني إنه لسه طفل صغير وبُكره يكبر ويعرف الصح من الغلط

خلو بالكو .. بتتقال كده بالظبط " بكره يعرف الصح من الغلط "

وكإن وحي من السماء هاينزل عليه لما يكبر يعرفه الصح والغلط

كل ده والطفل يقوم بإرتكاب تلك الأفعال الخاطئة على مرآى ومسمع من والديه .

. وهما ولا هنا ... بل قد تتعدى الامور لتصل إلى إنه يبهدلهم سواء باللفظ أو بالفعل وبيبقى على قلبهم زي العسل ..

انا اتحدث هنا عن أطفال صغار ممكن يكونوا 3 سنوات أو 6 سنوات ...

ومع ذلك يرى هؤلاء الأباء إن دي مش سن يتعلموا فيها الصح والغلط ..

وإن ده سن الدلع واللعب فقط ..

وبالتالي لما يكبر شويه ويدخل المدرسة بالذات هايعرف كل حاجه

ما دفعني إلى كتابة هذا الموضوع إني كنت قاعد بأتغدا أنا واخويا الصغير

بالأمس فجاله تليفون وأعتذر وقال لي لازم أنزل حالاً حيث إن إبن صديق له وقع وسنانه إتكسرت ..

فقلت له خير ؟

قال لي : ده عيل قليل الأدب ... وابوه كمان قليل الأدب ... وامه ست ما بتعرفش تربي ..

الولد عنده 3 سنوات ... من إسبوعين تلاته وقدام أبوه وامه ...

تسلق المكتبة اللي فيها التليفزيون وراح واقع من فوقيها إتكسرت

شظية القدم عنده وإتفتفتت حتت وراحوا جبسوها وكانت شغلانه

إمبارح وبرضوا قدم أبوه وأمه يتسلق نفس المكتبة ويقع على سنانه تروح سنانه متدغدغه ...

وقال لي إنه بيكون عند صديقه ده وقاعد في امان الله .

. ييجي الولا يقوم لازق أبوه بالقفا زي ما المخبر بيعمل في أي حرامي كده والقفا يطرقع .

. وأبوه يضحك ويقول ده عيل ...

الولا له أخ أكبر منه ييجي بسنتين ... بقوا الإتنين يبهدلوا بعض ضرب .

.. وشتيمه بألفاظ مش كويسه ... وبرضوا أبوه وأمه ولا هو هنا ... وبيضحكوا ويقولوا عيال ...




تكمل المصيبة بقى لما عيلة زي دي يروحوا يزوروا حد ..

. وتبقى انت قاعد وشايف المقروص من دول عمال يخرب في النيش أو يفكك

ريموت التليفزيون أو يتنطط فوق الأنتريه أو يدلق العصير على السجادة الغالية ...

وبتبقى هاتفرقع من جوه ونفسك تمسك الواد وابوه وأمه وترميهم من الدور السابع ..


. بس أدب الضيافة بيحوشك وبتبقى تنظر للساعة وعايز اللحظات تعدي وينكشحوا من عندك ...



شوفت نموذج زي ده ... بس الحمد له بتيجي في أخويا الكبير

فعديله - زوج اخت مراته - عقيد في الجيش وراجل المفروض إنه بتاع ظبط وربط وحزم ..

. لكن مع عياله ... عبارة عن ديب فريزر 24 قدم ببابين ..

.. ولو العيل جاب قنبلة عنقودية وفجرها في البيت قدامه .. ولا بيقوله عيب ولا غلط

وقد كان ... كانوا معزومين عند حماتهم وعيل من المقاريص كان عنده 4 سنوات ..

.. راح لم الجزم بتاعتهم وداخل المطبخ مدعبس على الكبريت وراح مولع في جزمهم وخلاهم يروحوا حافيين ..

أخويا دمه حامي مثلي .. فأنتظر إن أبوه يمسك الواد يعلقه بدل النجفة ..

. راح بكل بروووووووووووووود جايب الولد وقايل له ... عيب يا بابا ..

إنت لما تلعب في الكبريت كده ممكن إيدك تتلسع وتعمل لك يح ....

ولإن اللي بيزرع شيء بيحصده سريعاً ... فما فيش كام شهر ..

. ونفس الواد .. وبنفس الكبريت ... راح داخل جوه عربية أبوه اللي راكنها قدام البيت ..

. ومولع له فيها وجايبها له على الصاج ... بس نجي منها العفريت والعربية هي اللي راحت في الوبا ...

وبرضوا أبوه لسه ساقع وكإنه من القطب الشمالي ...


ويا سلام سلم .. لو تجرأت إنت وشخطت في ولد من دول قدام الأبوين الحلوين ..

. تبقى شغلانه ويعملوها قضية وممكن يقاطعوك لإن إنت جرحت سلوك مشاعر الننوس ....




العيب بقى إن فعل يُدلل باللغة الإنجليزية واللي إسمه Spoil هو نفسه يأتي بمعنى يُفسد

لكن إحنا في احيان كثيرة تلاقي الدلع بيختلط عندنا بالإفساد بالتدليل ..

. وفي الأخير يطلع لك كوكتيل عجب ...

وممكن تلاقي نماذج لأباء وامهات طبعاً من كتر تدليعهم في أبناءهم

تلاقي الولا عامل زي الشحط وعنده 5 أو 6 سنوات ولسه لا يعرف كي

ف يقضي حاجته بنفسه .. وبالتالي ممكن تلاقيه لسه بيلبس بامبرز ..

. وبأشوف عيال والله بيبقى عندهم 4 أو 5 سنوات ويكاد يكون طولي .

. ولسه ماسك بزازة في إيده وعمال يرضع حليب ...

أينعم دمي بيغلي .. بس أرجع وأقول أنا مالي إن شالله يتحرق ...

فالخُلاصة من وجهة نظري إن الوسط حلو ..

. يعني لا عنف غير مبرر مع الاطفال عشان ما يطلعوش معقدين وعدوانيين ...



ولا سبهلله وتدليل وقلة أدب من الصغر مع الأطفال عشان أول أشخاص

هايتطاول علهيم العيل من دول هو أبوه وأمه ... لإنهم هما اللي قدامه .

. وبالتالي هانخرج عيل زبالة للمجتمع ويبقى مصدر أذى للجميع ...


لاء و المصيبة إني انا رحت بيت ناس صحبنا كدا عندهم عيل لم يتجاوز السنتين

فأخوه الكبير يجي عنده 14 سنه بيقوله تعال فراح ابوه بيقول للطفل قوله مش عاوز

بعد كدا تفاجئت بان الأب يعلم إبنه إنه(((( يتف))))) على اخوه الصغير

طبعا بعد ما عملها الكل ضحك

انا بقى فكرت الله الواد دا دلوقتي بيبحث عن حاجة يجذب بها النظر

فهو لما (((تف ))) وجد إنه كل الناس ضحكت يبقى دي الي كان يدور عليها

المشكلة انا فكرت

إنه اليوم لما تف و هو صغير الكل ضحك لكن بكرة لما يتف و هو كبير قال الكل حيزعل منه

الله و ليكم عين تزعلوا دا انتم الي معلمينه يخرب بيت تفكير زي دا

اللهم اصلح حال المسلمين يارب


طبعا الموضوع فيه منه نقل و فيه منه مش نقل إجتهاد شخصي يعني هههههههههههههه

نقل حى مباشر

للواقع الاليم

عايشينة وشايفينة

ولو ححكى زيك مش حزيد غير قصة واحدة ولا اتنين

وربنا يهدى

السلام عليكــم ورحمـة الله وبركاتــة ،،

حلو كتير ها لموضوع
وفعلا بيحصل وبيخنق ويضايق لما تلاقى الاب والام ذى الكراسى اللى هما قاعدين عليها

بتبقى حاجه تخنق


وفعلا موضوع شويه مضحك

تقبل مرورى اخى الفاضل
تحياتى

مشكورين على المرور الطيب و ربنا يبارك فيكم يارب

و ميحرمناش من جميل ردودكم و جميل دعواتكم يارب

السلام عليكــم ورحمـة الله وبركاتــة ،،

طريقة ادراج الموضوع جميلة ومضحكة الا انها مبكية في الواقع ..

الواقع هذا مرير نعيشه ونعيش اكثر منه .

الاساس من التربية وصغر السن .. لانه الانسان لما بيكبر بيكبر بالي اتربى بيه والي نشأ عليه

فعيب الام والاب يربوا اطفالهم على خلق غير حسن .. ولما يكبر يتنرفزوا من التربية ..

وربنا يهدي ويصلح الحال ..

وفيه كثير اطفال ما شاء الله متربين ولبقين وحلوين ما شاء الله عليهم وعلى من رباهم ..

مشكورة اختي الكريمه على المرور و ربنا ما يحرمنا من جميل إضافاتك

سوء تربية

على فكرة فى علم النفس السن الطبيعى للتعليم حول المبادئ والقيم والمحاسبة هو سن 4
لكن هذا لايعنى انه الطفل يضحك له على سلوك غلط

نظرة العين تكفى لتعليم الطفل ان السلوك سئ وكذلك التعامل بالضحك يجعل الطفل راضيا عن اسلوبه وكانه يفعل مايعجبهم

بورك فيك اخى على طرح هذه المواضيع

لعل وعسى يخرج جيل غير الحالى

اختكم اسماء

مشكورة اخت اسماء على المرور و مشكورة على الإضافة الاكثر روعه


ربنا ما يحرمنا من جميل مرورك ولا جميل دعواتك يارب

والله الموضوع جامد اخ عاشق الجنان ...وياما اتمنيت ارمي الواد وامه وابوه من الدور السابع ههههه..المصيبة انه مرات بتلاقي انهم بيربوا اولادهم في بيوتهم ومتابعينهم كويس ولما يجوا يرحو كضيوف عند الناس ...تلاقي الاب او الام مدي لابنه الضوء الاخضر ولا كانه شايف عمايل ابنه ........معرفش الصراحة في المفارقة ده الواد يطلع عندو اي نوع عاهة نفسية ...هل بتاعت ابوه و امه ام طفرة جديدة في عالم العاهات النفسية ؟؟

لاء و دخلة و واثقة من نفسها ههههههههههههههههههه والله و كاني شايفك قدامي بتحلفي

شكل الموضوع دا كاين منغص عليكي






إيه الإجرام دا بقى دا اسمه اجرام مع الإعتراف و التحريض

طيب لو مفيش دور سابع اكيد مش حترميهم صح لانه الخطة بكدا مش حتكتمل هههههههههههه








على اساس انه الاب بيشتغل اشارة مرور اخر النهار ههههههههههه






مهو دا الي مجنيني

هو بيطلع عاهة كاملة مكملة

اضحك الله سنك
موضوعك جميل جدا وللاسف ان هوده بالظبط اللى بيحصل
ده طبعا غير اطلاق الاطفال فالشارع عشان يلعبوا واهاليهم تخلص منهم...
دى حاجة تانية تلاقيهم يتعلموا العنف والالفاظ السيئة
ربنا يرزق جميع امهات المسلمين بالذرية الصالحة النافعة لدينها ..
جزاك الله خيرا
نــــور

مشكورة اخت نور على المرور و على الاضافة و جزاكي الله كل خير