السلام عليكم



ازيكو يا جماعة

عاملين ايه


سؤال كده على الماشى وبعده ندخل فى التفاصيل




السؤال يقول


لو حد عاكسك بيكون ايه احساسك
بصراحو
وهل شكله بيفرق معاكى " يعنى امور ولا لا " بتفرق ؟


وايه كمان رد فعلك اما حد يعاكسك؟


فى الانتظار وللمووضوع بقية ان شاء الله

السلام عليكم ورحمة الله وبركاته 000


معلهش انا هتكلم عما سبق لانى دلوقتى وانا فى الس ده عمر مواحد معاكسنى 000


معلهش لو حصل هقول انه اعمى 0000 هههههه


ايام زمان لو حصل ياه متعرفش ايه اللى بيحصل 000 طب هقول لك اللى حصلى وانا فى الثانوى بالمنصورة 00

انا كنت فى المدرسة الثانوية اللى فى المختلط كانت اول مدرسة بنات فى المحافظة 000 وكنت فى الداخلى علشان انا كنت من ارياف المنصورة 000


خرجت فى يوم بتصريح انا وزميلة لشراء ملابس التربية الرياضية وفى السكة الجديدة جاه شاب ومش ورانا وهات كلام وحياتك ما منى الا ضربته بالقلم 00


وشاف المنظر عدة اشخاص وعينك ما تشوف الا النور خد علقة يحلف بيها طول عمره 000


معلهش ايامنا غير ايامكوا ممكن بعض البنات بيتبسطوا لما الاولاد يعكسوهم والله تصدق لما اقولك انى شوفت بنات وسمعت بيعكسوا الاولاد 000


طبعا انتى عامل الموضوع للبنات مش للعواجيز بس انا بعرفك فرق الزمن الاولاد كان عندهم نخوة بيدافعوا عن البنات 000

متزعلوش منى يا بنات طبعا انتوا اعظم بنات بانتسابكوا للاسلام 00

جزاك الله خيرا الابن الفاضل 000 بهاء وجعله الله فى ميزان حسناتك 000

انا اصلا اكره الخروج وحدي كي لا اتعرض لهذه المضايقات و نادرا جدااا ما اخرج وحدي و اذا ما اكملني احد اشعر بالاحراج الشديد و لا ارد و لا ابالي و احاول الابتعاد و اذا لم ينفع كل هذا ارد : لا اريد مكالمتك ابتعد من الافضل لك و ارمق الشخص بنظرات مخيفة جدااا فيبتعد بسرعة
انا مرعبة
ههههه
و لا اختلاف بين شاب وسيم او لا لانه اصلا و قبل كل شيء شاب غير متخلق و يقوم بتصرف غير لائق
و شكرا على الموضوع

السلام عليكــم ورحمـة الله وبركاتــة ،،

موضوع جميل يا اخ بهاء و لو اني لسه مش عارفة ايه الغاية منه لانه على حسب ما انت كاتب دي مجرد مقدمة بعدين ندخل في صلب الموضوع

المهم انا لما بتعرض لمعاكسة بطنش طبعا كاني مسمعتش اي حاجة و و الله بزعل من نفسي جدا و اضايق و بحس انه في حاجة غلط فيا انا فبقعد افكر ايه الحاجة اللي فيا خلت الشخص ده يعاكسني
زمان كنت بقول لاني مش محجبة بتعرض للمضايقات دي بعدين اتحجبت و نفس الشي قلت يمكن لانه حجابي مش شرعي, و فعلا اول ما عملت الحجاب الشرعي و احترمت لباسي و غضيت بصري مبقتش بتعرض للمعاكسات دي الا في حالات نادرة من ناس مش محترمة و مبيعرفوش ربنا

و بالنسبة لكلام ماما فادية فعلا في زمنا ده بقت المعاكسة من الجانبين يعني في بنات بتعاكس الشباب ربنا يصلح حال شبابنا و يهدينا
اللي انا مستغرباه انه في اوروبا مفيش معاكسات نهائيا يعني مستحيل تبقى اي بنت ماشية في الشارع بيعاكسوها يعني كل واحد ملتهي بنفسه بيقرالو شي كتاب او جريدة او سارح بيفكر مش عارفة في ايه و ده شفته انا بنفسي و استغربت ليه, يعني المشكلة عند الشباب العربي مش الشباب بصفة عامة رغم اننا مسلمين و اسلامنا ضد الحجات دي بس احنا بنعملها اكتر من غيرنا و بقت موجودة في كل مكان مفيش اي حتة تروحها الا و تلاقي فيها شباب بيعاكسو ؟؟؟؟؟؟؟؟؟؟؟؟؟؟؟؟

ايه رايك تهكس ونسال الشباب لو في بنت عكستك زي مثلا ع تعمل ايــــــــــــــــــــــــــــــــــــــــــــــــــــــــــــه

انا بقى وانا ماشى الاقى البنات مهوسة بيا

وطول ما انا ماشى بقى ايه الجمال دا

يا ارض اتهدى وابلعينى لو مرد عليا

ايه العيون الزرقا دى ايه الشعر الاصفر دا

طيب كلمنى وعبرنى

ويا سلام بقى لما تكون معايا مراتى بتعمل ميت مشكلة مع البنات

مبقاش عندها شباشب من كتر ما قطعتهم على البنات اللى بتعاكسنى

بس هيا حالة واحد بس انى ارد على واحدة

لو قالت لى ايه رايك فى برنامج الانتى فيروس على طول اروح اكلمها

ههههههههههه

طبعا دخلت موضوع مش ليا سورى

خيرها فى غيرها

منورين يا جماعة

طبعا زى ما قالت سدرة المنتهى انى قلت للموضوع بقية


وفعلا ليه بقبة وتفاصيل هندووووووووس فيها مع بعض باذن الله
بس اعذرووووووووووونى
وكمان ادعوووووووولى

بكرة عندة تيست لغة فى شركة بعتتلى فده اللى معطلنى عن التكملة دلوقتى


ولغاية ما نكمل............. نعرف رأى الباقى ايييييييييييييييييه؟
هاااااااااااا
عاوزين تفاعل اكتر


انتظرونااااااااااا وزورووووووونا تجدوا ما يسركم

فادية يوسف

طبعا يا ست الكل لازم كانو يعاكسوكى بس سيبك انتى القلم ده كان لابد منه فعلاااا تصرف جرىء وجامد جدا

وطبعا كلامك الاخير عن انقلاب الحال ان البنات هى اللى بتعاكس دلوقتى صح اكييييييييد ولا شك فيه وان شاء الله نتعرضله برده



محبة الجنة
كويس تصرفك بس انت ربنا بيحبك بيبعتلك شباب بتخاف وانتى بترعبيهم غيرك بيقابلو شباب رخم ولا بيخاف ولا بيحس على دمه حتى لو اتهزق


سِدرة ُ المنتهى
هرجع لكلامك تااااانى لانك معايا على نفس الخط ويمكن كلامك من ضمن باقى موضوعى وغايته

الجوهري
هنتعرض للنقطة دى بس حاجة حاجة بس قولى يعنى ايه تهكس

السندباد البحرى
يا رااااااااااجل يا بخخخخختك

قبل حاجة وعشرطعشر سنة يابهاء لما كنت اتعاكس
كان بعض الكلام مهضوم وأمور وأما اللي بيعاكس فمش مهم يكون أمور والا صرصور
مثلا " يجعل أمك حماتي " يعني جملة لطيفة وأمورة

و كمان كان فيه كلام مش عارفة أوصفه
هو مش أمور
ولا مهضوم
ولا مفهوم
ولا ................. المهم حال المعلق مع نهاية التعليق ( هو يا إما بيجري وخالتك متسلحة بالكعب العالي وجري وراه , يا إما راكب عربية شرطة النجدة وخالتك ياعيني راكبة معاه )

أظن من السهل استقراء مشاعري في كلتا الحالتين

السلام عليكم ورحمة الله وبركاتة

اللى بعرفة ان فى بنات بتكون مبسوطة جدا وهى ببتعاكس يعنى بتحس انها بنت ومرغوب فيها وعلى فكرة الكلام مش رأى دا رأى البنات لانى سمعت الرأى دا منهم بس اكيد دا شريحة منهم وفى بنات برضوا بيساؤا من مسألة المعاكسة دى وبيعتبوا الشاب اللى بيعاكس دة مش محترم وبيسكتوا وما بتكلموا وبمشوا فى حالهم و فى شريحة بقة بتتعاكس وهى اللى بتجيب لنفسها المعاكسة من فعل من طريقة لبس من اى شىء ملفت تجبر الولد انة يعاكس وفى شريحة بتتعاكس وبترد يا اما قولا او فعلا على المعاكس دة يا اما بتشتمة او فى بعض الحالات النادرة تضربة وفى شريحة تانية هى اللى بتعاكس الولاد ودول انا شفتهم بقى مش بيهما حاجة غيلر انها تعاكس الشخص المراد معاكستة وبتعاكسةة فعلا وفى ولاد بيستجيبوا وفى ولاد بيكبر دماغة ويمشى وارجع واقول اهم شىء التربية وخصوصا عن البنين لانة المفروض يعرف ان دى اخت لية فى الشارع لازم يكون فى شىء من الاحترام والادب وكذلك البنت انها تحافظ على نفسها قولا وفعلا وارجع واقول لازم نرجع مرة تانية الى تعاليم الاسلام اللى لا غنى عنها فى شتى امور الحياة .............كلمة

فتاة مُتحرّرة : فئة منهـم يجدون ان المعاكسـات هي لقمـة العيش لأرواحهـم ..

فتاة متجمِّـلة : تتوق للمعاكسـات وتدعي غياب العدل ، ووحشية العيون الجائعة .

فتاة مسكينة : وجدت جماهير ينظرون إليهـا ، فإعتقدت أنهـا على مسرح التمثيـل




أشعر أن هنـاك أعمى أصاب الهدف ..

لكن أسارع في حفظ نفسي فرب نظرة أورثت في القلب ألف حسرة ..

ويحزنني ما أصاب المُعاكس ، لأنه بنظري يفتقر إلى الحنان والحُب ، ويفقتر للدين أولاً ..



والمؤسف أن المعاكسات إنتشرت وأصبحت جزءاً من الحياة اليومية ، وصبراً ستصبح مهنة ولقمة العيش !




سؤال لكل معاكس : لما إنتا تنظر وتناظر ، وتعاكس ... والفتاة مشيت خلاص ، وبعد ! ماذا إستفدت ؟



سؤال لكل إمرأة لما تُعاكسين من أحد : ألا تشعرين أن هناك جزءاً فيكي يحن للإصلاح ، إلا إذا حسب الإنسان أنه كامل فهذا دليل على نقصان العقل .




أحوك علاء
كل الإحترام .

جزاك الله خيرا يا كلمة وربنا يهدي البنات ويرحموا الشباب من لبسهم ويهدي الشباب ويغضوا ابصارهم

بس بقول لكل بنت اللي يعاعكسك اديله واحدة تكشيرة من اياهم وواحدة احترم نفسك هيكرهك ويمشي

السلام عليكــم ورحمـة الله وبركاتــة ،،
الحمدلله والصلاة والسلام على رسول الله وعلى آله وصحبه أجمعين
مشكور اخي الكريم علي الموضوع الجميل
وحتى نكون عادلين فى مناقشة موضوع كهذا
فان المسؤولية تقع على عاتق الطرفين
اما ما تشعر به الفتاة فينقسم الا اقسام ويعود ذلك
الى اختلاف التربية الاسرية والدينية
فمنهن من يشعرن بالاسف حيال ما يفعله الشباب
من معصية لله ومضيعة للوقت ومنهن من يشعرن برضىً
عن انفسهن (عاكسنى يعنى انا جميلة)وذلك ناتج عن نقص
فى الثقة بنفسها ومنهن من يسعين وراء ذلك
عافانى الله واياكم.وجدير بالذكر ان المعاكسة لم تعد قصرا
على الفتيات ( الوحشة بالمفتشر كده) ولم يعد الحجاب مانعا
لهذه المعاكسات او للنظرات الوقحة الا انه يقلل منها بنسبة كبيرة جدا
وحتى نكون عادلين فإن الشباب غير ملومين فى بعض الحالات لان لبس
الفتاة عادة يكون جالبا للمعاكسات وغيرها
جزاك الله خيرا اخى الكريم واعاننى واياكم على فعل الخير امين

السلام عليكم ورحمة الله وبركاته

بصراحة انا جاية اقول كل حاجة بصراجة شديدة واللي يحصل يحصل

لو حصل اني اتعاكست بكون في الاول خايفة,, لان الانسان اللي بيعاكس دا اما شاب طايش او مراهق بيقلد صحابه تقليد اعمى او انسان غرضه مش كويس

وفي كل الحالات شخص زي دا يتخاف منه او بمعنى تاني مش متوقعة رد فعله

عشان كدا مش برد وبعمل نفسي مش واخدة بالي وبكمل طريقي زي ما هو لا ببص ورايا ولا بتلفت ولا ارد عليه

اما في معاكسات التلفون فلو رن رقم غريب وشاكة انه حد اعرفه ومش مخزنة النمرة بخلي حد من اخواتي الصبيان رد


ارجع للي كنت بقوله عن المعاكسات ع الطبيعة


صحيح بكون خايفة وقتها وببقى حريصة .. لكن بعد ما بيخلص الموقف الواحد بيحب يحكي الموقف وهوا جواه نوع من حاجة ما بين الفخر و السعادة كدا !!

لانه مفيش حد مش بيحب الإطراء .. خصوصا البنات

اه احنا عارفين انه بيعاكس وخلاص .. مش معنى اني اتعاكست اني كدا ملكة جمال

زمان كان الواحد ممكن يسأل نفسه هوا انا كنت لابسة حاجة تخليني اتعاكس فعلا ؟؟ وكان الموضوع فيه زعل هوا ازاي يفكر فيا كدا ويعاكسني ؟؟

لانه دلوقتي اي حد بيتعاكس سواء محجبة منتقبة او حتى لابسة لبس ملفت كله بقى يتعاكس


وبردو كلامي مش معنه انه الواحد بيستنى انه يتعاكس .. لكن فكرة انه اتعاكست مابقتش زي زمان ..

يعني الحمد لله انا مش بخرج لوحدي اصلا عشان اخلي في مجال للمعاكسة من اي نوع . بس بصراحة اي بنت بتبقى مبسوطة انها اتعاكست ، او على الاقل بتروح تحكي اللي حصل لصحابها لاهلها

حتى لو بتحكيه باستياء .. هيا بتحكيه لانه موقف البنات بتحس انه طبيعي يحصل لبنت واتحدى واحدة تقولي انها لما اتعاكست مكانتش حاسة بحاجة ممكن نسميها سعادة مع ان المسمى دا مش الصحيح مية بالمية
ودا عمره ما كان معناه قلة ثقة بالنفس او اي سيء من هذا القبيل ..


خلاصة الكلام :::

# مش معنى كلامي انه المعاكسة ظاهرة كويسة بل بالعكس كلنا لازم نحاول نقلل منها سواء البنات او الولاد

لان دلوقتي حتى البنات بقت تعاكس الولاد والله.

# البنت لما تتعاكس دلوقتي مش معناه ابدا انها كانت لابسة وحش او مش محتشمة او كانت ملفتة او .... لانه دا مابقاش معياردائم للمعاكسة



في كلام تاني بس راح عن بالي دلوقتي .. وراجعة ان شاء الله تاني واحتمال يعني احكي مواقف

اه افتكرت حاجة كدا ..

انه كل واحد لازم يعاكس .. اللي متجوز يعاكس مراته

واللي لسة عازب يعاكس اخته

ولو مش عنده اخوات يعاكس مامته

ولو مفيش حاجة من دى متوفرة .. يعاكس نفسه في المراية

منوريييييييييييييييييييين

والردود روووووووووعة


ها
كملو
ولنا عودة
وحاضر يا شادى
هتوصى بيك شوية
ههههههه


نحن فى الانتظار وانتم فى الاستمرار

المعاكسة مش هقول ظاهرة ولكنها أصبحت عادة يومية
أصبحت من سيناريو اليوم زى العمل بل اكثر
العمل ممكن تاخد منه اجازة لكن المعاكسة وكما هو ظاهر مفيش منها اجازة
ان مكنش فى الشارع يبقى فى الجامعة وان مكنش فى ده ولا ده يبقى فى التليفون


وزى ما الاخوة والاخوات قالوا ان اللبس مبقاش مقياس او دافع اساسى للمعاكسة لانو زى ما بنشوف بعض من اللى بيعاكسوا مش بيفرقوا بين متبرجة ومحتشمة " بس برده محدش يقدر ينكر الدافع والدور الكبير اللى بيلعبه اللبس فى موضوع المعاكسة ده "
حيث انو لو اتنين ماشين فى الشارع واحدة متبرجة وواحدة محتشمة وهناك شخص بيعاكس " اكييييييييييد هيعاكس المتبرجة عله يلقى منها القبول "


يعنى نقدر نقول ان اللبس عامل من العوامل اللى بتساعد على الحكاية دى

كمان التربية " غياب التربية فى المنازل سواء للاولاد او البنات
الاولاد مفيش توجيه
ومفيش اخلاق
ولا التزام ولا تدين
ولا رجولة " لانو لو عندو رجولة ابدا مش هيفكر يعاكس واحدة على الاقل محتشمة "لانو اكيد عنده اخت او واحدة من قرايبه كده
فطبعا غياب الرجولة خلى الشباب مش بتفكر فى نقطة زى دى وبيعاكسوا وخلاص مش فارقة معاهم محترمة ولا لا " محتشمة ولا لا "


كمان الفراغ عند الشباب
الشباب مش وراها حاجة " يبقى تعمل ايييييييييييه " تسلى نفسها ازاااااااااااااااى ؟
تنزل بقى تعاكس فى خلق الله
لكن لو وراه حاجة شغلاه مش هيبقى فاضى بقى يقف بالساعات فى الشوارع يعاكس او يروح النوادى او او او

وطبعا ده يضم نقطة تانى وهى الفشل فى التعليم لانو اغلب اللى بيعاكسوا دول اغلبهم فشلة فى التعليم لانو التعليم مش شاغلهم ولا بيضيع لهم وقت فبالتالى مش وراه تعليم يشغله ويذاكر وكده وبيبقى فاضى وبالتالى اول ما بيخطر على باله هو المعاكسة



كمان النقص وقلة الثقة فى الذات
عقدة النقص عند الشاب
احساسه انو مفيش حد ممكن يرضى بيه وده لانو مش واثق من نفسه ومن امكانياته
بيحاول يضحك على نفسه ويعاكس لعل وعسى واحدة " طبعا مش محترمة " ترضى تعبره بالبلدى كده
وبينسى المسكين ده انو ده مش مقياس ابدا لانو اللى رضيت دى ترد عليه وتتجاوب معاه عندها نففففس الاحساس

على فكرة النقطة دى عند البنات بتحتل مكان اكبر شوية
احساسها بانوثتها وكمان اقناعها لنفسها انها حلوة وانها مرغوبة والكل بيمشى وراها وكده " بتضحك على نفسها واحيانا تتجاوب مع اللى بيعاكسها " علشان تعيش اللحظة دى انها بقى مطلوبة وانها كده تبقى جميلة وبنوتة بجد و و و و و
وبتنسى المسكينة دى ان ده ابداااااااااااااا عمره ما كان المقياس لانوثتها ولا جمالها واكبر دليل انو اى واحد هيحب يتجوز مش هيروحلها ولا هيبصلها اساسا


كمان نقطة تانى عند البنات وهى الغيرة
غيرتها من صاحبتها اللى تعرف واحد " مصاحباه " غير بقى الكلمات بين البنات اللى بتحمل معان محرجة للبنت " بتحس بقى انها مش بنت وانه محدش معبرها زى صاحبتها " وبالتالى بتحاول تعوض النقطة دى انها تعاكس او تستجيب للمعاكسة علشان ترضى غرورها وطبعاااااااااااااااا " جرى تروح تحكى لصاحبتها " علشان تعرفها انها بنننننننننننننت زيها


كمان الرهان بين الشباب وكمان البنات
الشباب مع بعضهم يتراهنوا على اللى يقدر يأثر على فلانة وتبدا بقى المعاكسات بمختلف انواعها لكسب الرهان ده

وكمان بين البنات يتراهنوا على فلان مين اللى تقدر تخليه يتعلق بيها وكده " وتبدأ المهاترات " اقصد المعاكسات "


غياب الرقابة على الشاب والفتاة بيكون عامل اساسى برده لان الشاب او الفتاة مش بيكون خايف لانو مفيش حد اخد باله منه فبيعمل اى حاجة



دى نظرتى كشاب عايش وسط الدواامة دى
اتمنى كبار السن والعقول ان يشاركونا بوجة نظرهم

وبعدها المهتمين والقادرين على ابداء اراء وافكار نقدر بيها على الاقل نقلل هذه العادة " على الاقل عندنا

السلام عليكم ورحمة الله وبركاته 000


بارك الله فيك يا بهاء كل كلمة قلتها انا معاك فيها وكل الاسباب اللى قلتها تمام 000


الحل 0000 تغيير جذرى للعادات والتقاليد 000 ياريت ترجع كتاتيب زمان كانت بحفظ الاولاد القران 000


تدريس التربية الدينية المفقودة فى مراحل التعليم عندنا 000


الردع القوى من رجال الشرطة للشباب 000


شوف يا بهاء هتضحك لو قلت لك وانا برد جالى تليفون على المحمول من واحد بيعاكس فكره ان النمرة بتاعت شابة 0


نرفزنى ولما اديت المحمول للحاج وسمع صوت راجل افل 000


اخر الكلام عندى بعد كده ما فيش فايدة 000 ياراجل حتى العواجيز ما سبهمش ههههههههه وانا متنرفزة 000

السلام عليكــم ورحمـة الله وبركاتــة ،،

موضوع بجد جديد بس على فكرة هو مش بسيط
بص يا سيدى
الصراحة فى معاكاسات من شباب بتبقى مقبولة وفى معاكسات بتبقى الصراحة مش ينفع فيها غير انك تقلع الى فى رجلك وتديلهم
بس احسن حاجة البنت تعملها لما تتعاكس انها مش ترد
بس الصراحة دلوقتى الولاد معتش فى تفرقة بين واحدة محجبة وواحدة مش محجبة حتى المنقبات بتتعاكس
يعنى خلاص الصبيان من كتر مهى فاضية بتعاكس او تقدر تقول تضيع وقت
بس على فكرة من كتر ما حصل تحرش للبنات والاولاد علشان مش يزعلوا انهم بس الى بيعاكسوا فى قانون هيصدر على التحرش
كدة باة البنات تقدر تمشى فى الشارع بثقة[color="#8B0000"][/color]

بسم الله الرحمن الرحيـم ..

كل التقدير لك أخي بهـاء على ما قدمت ، أعتقد برأي الشرح الكافي لأسباب المشكلـة ..

المؤسف أنّ مازالت هناك فئة من الأخوات الملتزمات تقول "بعض المعاكسات مقبولة !! .. وأشعر بسعادة داخلية عند المعاكسة !!"


أتوقع بوجهة نظري أنه ينبغي أن تقوم حرب بيننا وبين المُعاكس ، إنما هي حرب على المعصية .. لا على المعاكس ! قد لا نكون عشنا ظروفهم
.. فهم بحاجة لتوجيه بحاجة ليد حانية لقلوبهم المفطورة ..


ومن أسباب الحل لهذه المشكلة ..

إستشعار رقابة الله ، والغيرة على دين الله وعلى المسلمـات .

اليقين بأنه كما تدين تدان ، فيصدك قلبك وعقلك عن المعاكسة كي لا تعاكس ذريتك وأختك وقريبتك .

الصحبة وبرأي هي العامل القوي الذي يتجبر على جميع العوامل الأحرى .. فكما يقولون "الصاحب ساحب" ..

قلة تلقي الحنان النابع من الأسرة ! بل قل ليس هناك للحنان والحب وجود في عالم الأسرة الآن .

العلم بأن كل قطرة دم يضخها القلب إلى العين فتبصر الحرام والنظر للحرام مسؤولون عنهـــا ..

العلم بأن الجمال زائل ، والمسلم ليس بقدر ما يعرف من فتيات أو يعاكسهم ! بل بمقدار ما يكون في القمة ويتكبر عن النظر للحرام .

آخر سبب للحل .. الرقابة على شبكات العبنكبوتية التي يتمتع الفرد فيها بحرية في النظر للحرام .. فيتصور كل فتاة تمر أمامه ويبدأ يتخيل أن ما تحت النقاب والحجاب هي إمرأة كما يريدها فتدفعها نفسه للمعاكسة الهادفة لسد شهوته

بالعين ..






الله المستعان
أخوك علاء.

اخى بهاءموضوع يحمل بين طياته النصحية الطيبة
جزاك الله كل خير

ولكن صدقنى يااخى البنت الملتزمة ان راها المعاكس لن يضايقها ابدا مع انه يعاكس المتبرجة امام عينيها بل يحرص على راحة الملتزمة

موقف حدث لى شخصيا
بنت للاسف تلبس لبسا محرجا (صدقنى مخزيا )اثنان حاولوا ان يرموا ببعض كلمات
كنت مارة فى الطريق نفسه
بمجرد مرورى مسك احدهم يد صاحبه وقال (ابعد عن طريق البنت)قالها بنبرة حرص على عدم ازعاجى ولو فى المرور


سبحان الله
الذى كان يرمى كلمات لبنت تلبس لبسا فاضحا (للاسف البنت كانت تبدى فرحة امامهم بالكلمات )
يسعى لراحة بنت تلبس لبسا اسلاميا



الحرص يابنات الاسلام على لبس الزى الشرعى واتقوا الله
وياشباب ويابنات غض البصر اطهر واسلم للقلب



وهدانا الله واياكم لخير مايحب ويرضى

اختى اميرة ابدى اعجابى بموضوع ان الشاب يعاكس اخته او امه
فهى معاكسة تزيد الود ودا والاخوة جمالا

فادية يوسف

يا ستى مانا قلتلك قبل كده هتفضلى تتعاكسى وانا اول المعاكسين
ههههههههههههههه



طيب هل تعتقدى ان التغيير الجذرى للعادات ده ممكن فعلا يحصل؟





مى خلف

حلو يا مى كلامك
بس ممكن نعرف ايه ملامح المعاكسات المقبولة " وعلى اى اساس بتكون مقبولة "؟
هل على الكلام
وعلى الشخص نفسه
ولا على البنت نفسها ولا ايه

مستنى ردك

عـلاء
اشكرك على المرور الطيب
وفعلا كلام عين الصواب ان طبق

دمت بخير



أسماء فلسطين
كلامك مظبوط ولكن ده يتوقف على طبيعة المعاكس
يعنى ان كان عنده دم ولا لا
لان فعلا فيه ناس مش بتفرق الا انى اتفق معك ان الملتزمة احيانا تجبر المعاكس على ان يلتزم الصمت على الاقل حتى تمضى وتمر

جزيتى خيرا

السلام عليكــم ورحمـة الله وبركاتــة ،،

بهاء كلامك تمام مية في المية مش هضيف عليه حاجة لان دي فعلا الاسباب الشائعة للمعاكسات من الشاب او الشابة
بس اسماء عندها حق اللبس المحتشم كمان ليه دور مهم في المعاكسات على الاقل لما اخرج بلبس محترم و شرعي و اغض بصري هبقى راضية بيني و بين نفسي و لو شاب عاكسني يبقى مريض مش تصرفاتي و لبسي هما اللي خلوه يعمل كده و لو في ناس محترمة شافت شاب بيعاكس بنت محتشمة اكيد هيكون في رد فعل ضد للمريض ده بس لو كانت بنت لبسها مش كويس هيسكتو و يعذروه لانها هي اللي استفزته و مش بعيد هما كمان يعاكسوها

يعني الحل الوحيد اللي مش شايفة غيره هي التربية زي ما قالت ماما فادية يعني اولادنا نربيهم على المبادئ و القيم الاسلامية و الرجولة عشان يخافو على بنات الناس زي ما بيخافو على اخواتهم و اهلهم و كمان البنت منسمحلهاش تخرج من البيت بلبس مش محتشم عشان تتجنب معاكسات الشباب

ربنا يهدينا و يهدي شبابنا المسلمين اجمعين و يثبتنا

سدرة



كلامك تمام وفعلا زى ما قلتى بالظبط والله
اللبس المحتشم كمان ليه دور مهم في المعاكسات على الاقل لما اخرج بلبس محترم و شرعي و اغض بصري هبقى راضية بيني و بين نفسي و لو شاب عاكسني يبقى مريض مش تصرفاتي و لبسي هما اللي خلوه يعمل كده و لو في ناس محترمة شافت شاب بيعاكس بنت محتشمة اكيد هيكون في رد فعل ضد للمريض ده بس لو كانت بنت لبسها مش كويس هيسكتو و يعذروه لانها هي اللي استفزته و مش بعيد هما كمان يعاكسوها



فعلااااااااااااااااااا " وده واقع

السلام عليكــم ورحمـة الله وبركاتــة ،،
انا حبيت اعقّب على كلام الاخت الفاضلة فادية يوسف
انا مع حضرتك ان التربية السليمة ليها دور كبير اوى
بس لازم نعترف ان بعض الاباء قد يفتقروا الى التربية السليمة
ثانيا لو اخذنا بالقول ان رجال الشرطة يجب ان يتصدوا لذلك بالقوة
يبقى الشرطة موارهاش حاجة الا الجري ورا الشباب ومراقبتهم ههههههههههههههههههههه
الا بقى لو حضرتك قصدتى المعاكسات الجامدة مش كلمة بسيطة وخلاص
وانا على يقين تماما واتفق فى ذلك كليا مع الاخ بهاء ان معظم المعاكسات ناتجة عن
الفراغ الكائن فى حياة الشباب فلو وجد كل منهم ما يشغل به وقته لما وجد وقتا لا للمعاكسة
ولا لغيرها من المواضيع التى لا تجدي نفعا
هدانا الله لما فيه خير هذه الامة

pure heart

صدقتي

نرجع لنفس كلام حنان حنين فى موضوع اخر


غياب الوعي مشكلة كبيرة جدااااااااااااااااااااا

عدناااااااااااااا " بعد الفاصل "



طيب ايه اسبااااااااااااااااب معاكسة الفتاة للشاب

ماهو الاية اتعكست دلوقتى فى كلللللل حاجة

هه
فتيات مجنونات ليس عندهن كرامة و لا حياء و لا اخلاق
تعجب بشاب و ترغب في الحصول عليه باي طريقة

محبة الجنة


هل هى فعلا فتيات تريد هذا
ولا حابة تجرب
ولا زيها زي غيرها

اشمعنه فلانة وفلانة
ولا موضة
ولا ايه بالظبط؟

وصف دقيق


هناك سبب آخر إنما دة لو كانت الفتاة مثالية كأن تكون تريده زوجاً لها ـ مش بالمعاكسة طبعاً



وبعضهم ربنا يجبر بخاطرها أعجبها فلان بشخصه بمظهره بماله بمكانته ، فتريده لها كي تتكابر وتتمتع بــ ماله


أما السبب الأخير بوجهة نظري ، فدة لإنها تبحث عن من يَرمي لها كلمات معسولة ، ومن تشاركه حياتها ، لأنها وبكل أسف لم تسمع كلمة حلوة مرة بحياتها من أهلها ، وتشوف الي حوليها يذكرون قصص معشوقهم

والكلمات المزخرفة التي يسمعونها من عُشاقهم ، فتلجأة للبحث عن .... الحب الأعوج





علاء

يا عم علاء
عمر ما هتكون البنت مثالية وهتعمل كده حتى لو تتمناه زوج ليها " لو عملت كده يبقى دى من البدااااااااااية مش مثالية " دي منحرفة "




اما كلامك ده فاتفق معا برده "أما السبب الأخير بوجهة نظري ، فدة لإنها تبحث عن من يَرمي لها كلمات معسولة ، ومن تشاركه حياتها ، لأنها وبكل أسف لم تسمع كلمة حلوة مرة بحياتها من أهلها ، وتشوف الي حوليها يذكرون قصص معشوقهم